အညာဒေသဖြစ်တဲ့ မုံရွာခရိုင်၊ ဘုတလင်မြို့နယ်၊ ညောင်ကန်ကျေးရွာကထွက်တဲ့ငရုတ်သီးက အင်မတန်စပ်တာကြောင့် အညာဒေသမှာတော့ နာမည်ကြီးလွန်းလှပါတယ်။ စပ်လွန်းလှတဲ့ ငရုတ်သီးကို ကြက်သွန်နီနဲ့ပေါင်းပြီးထောင်းလိုက်ရင်တော့ သိပ်မစပ်တော့ဘဲ စားလို့ခံတွင်းတွေ့လှပါတယ်။ ဒါ့ကြောင့် ဒီနေ့မှာတော့ ငရုတ်သီးထောင်းနည်းလေးဝေမျှချင်ပါတယ်။
ပါဝင်ပစ္စည်းတွေကတော့
- ငရုတ်သီးအခြောက်တောင့် ၁၅တောင့် (ငရုတ်သီးအခြောက်တောင့် မရနိုင်ရင်တော့ ငရုတ်သီးအကြမ်းမှုန့် ဟင်းစားဇွန်း(၃)ဇွန်းခန့်ထည့်ပါ)
- ကြက်သွန်နီ(၃) လုံး
- ဆားအနည်းငယ်
- ဆီ ဟင်းစားဇွန်း(၃)ဇွန်း
ပြုလုပ်ပုံအဆင့်ဆင့်
- ငရုတ်ဆုံထဲသို့ ငရုတ်သီးအခြောက်တောင့်များကို အလယ်ချိုးကြည့်ပြီး မှိုမတွေ့မှသာ ခွက်တစ်ခုထဲသို့ ထည့်၍ ရေဆေးပြီး ရေစစ်ထားပါ။
- ကြက်သွန်နီအခွံနွှာ၍ လေးစိတ်ခွဲထားပါ။
- ထို့နောက် ထောင်းမည့် ငရုတ်ဆုံထဲသို့ ရေဆေးထားသော ငရုတ်သီးခြောက်နှင့် ကြက်သွန်နီ လေးစိတ်ခွဲလှီးထားတာကို ထည့်ပါ။ ဆားထည့်ပြီး မညပ်တညက်ထောင်းပါ။
ထောင်းပြီးပါက ပန်းကန်ထဲသို့ ထည့်၍ ဆီလောင်းပြီး စားသုံးနိုင်မည်ဖြစ်ပါသည်။ ငရုတ်သီးက ကြက်သွန်နီနဲ့ ထောင်းထားတဲ့အတွက် အစပ်ကိုလျော့စေတဲ့အပြင် ဆီရွှဲရွှဲလောင်းစားမယ်ဆိုရင် အစပ်ကိုပိုလျော့စေတာကြောင့် အစပ်ကြောက်သူတွေအတွက် ပိုအဆင်ပြေမယ်ထင်ပါတယ်။ အစပ်ကြိုက်တဲ့သူတွေကတော့ ဆီမဆမ်းဘဲ စားလည်း အကြိုက်တွေ့မှာပါနော်။
